Ադրբեջանի ԱԳՆ-ն՝ ԱՄՆ պետքարտուղարի օգնականի հայտարարության մասին

02 0Հոկտեմբերի 2024 - 12:01

ԱՄՆ պետքարտուղարի՝ ժողովրդավարության, մարդու իրավունքների և աշխատանքի հարցերով օգնական Դաֆնե Ռենդի հոկտեմբերի 1-ի հայտարարությունը Վարշավայի «Մարդկային չափումների» համաժողովում, որ «Միացյալ Նահանգները շարունակում է դիտարկել Լեռնային Ղարաբաղում միջազգային մարդասիրական իրավունքի և մարդու իրավունքների ենթադրյալ խախտումները», զարմանք է առաջացնում։

Ինչպես հաղորդում է Armenia.Az-ը, այս մասին հայտարարել է Ադրբեջանի ԱԳՆ մամուլի քարտուղար Այխան Հաջիզադեն՝ մեկնաբանելով հոկտեմբերի 1-ին Վարշավայի «Մարդկային չափումների» համաժողովում ԱՄՆ պետքարտուղարի օգնականի արած հայտարարությունը:

«Հատկանշական է, որ չնայած ադրբեջանական տարածքների ռազմական օկուպացիայի և ադրբեջանցիների ջարդերի ժամանակ Հայաստանի կողմից մարդկության դեմ իրականացված լայնածավալ հանցագործություններին, ամերիկյան կողմը միայն հիմա է խոսում միջազգային մարդասիրական իրավունքի խախտումների վերացման կարևորության մասին։ Միացյալ Նահանգները գրեթե 30 տարի աչք է փակել Հայաստանի հանցագործությունների վրա:

Եթե ամերիկյան կողմը ցանկանում է դրսևորել անաչառություն և արդար դիրքորոշում, ապա նախ պետք է պահանջի, որ հետաքննվեն Հայաստանի կատարած բազմաթիվ հանցագործությունները, և մեղավորները պատասխանատվության ենթարկվեն օրենքի առջև։

Հակառակ դեպքում, սա ոչ այլ ինչ է, քան հայկական քարոզչության արդյունքում արված միակողմանի հայտարարություն, որի նպատակն է մոլորեցնել միջազգային հանրությանը և շեղել ուշադրությունը հայկական ագրեսիայի ժամանակ հարյուր հազարավոր ադրբեջանցիների հիմնարար իրավունքների և ազատությունների կոպիտ խախտումից»,- ասել է Այխան Հաջիզադեն:

ARMENIA.AZ