Իլհամ Ալիև. «Ադրբեջանը բարձրագույն լիգայում է, Հայաստանը՝ երրորդ»

14 Հունվարի 2020 - 09:35

Ադրբեջանի և Հայաստանի բոլոր մակրոտնտեսական, ռազմական և սոցիալական ցուցանիշների միջև հսկայական տարբերություն կա:

«Հայաստանի վարչապետը վերջին շրջանում հաճախ է համեմատում Ադրբեջանին և Հայաստանին՝ նշելով, թե որոշ ցուցանիշներով Հայաստանն առաջ է անցել Ադրբեջանից: Իրականում Հայաստանը զիջում է Ադրբեջանին բոլոր ցուցանիշներով: Դա երևում է վիճակագրությունից», - հայտարարել է Իլհամ Ալիևը՝ երկուշաբթի 2019 թվականի արդյունքներին նվիրված խորհրդակցության ժամանակ, տեղեկացնում է Аrmenia.Az-ը՝ վկայակոչելով Ինտերֆաքս Ադրբեջանին:

Նախագահը նշել է, որ Ադրբեջանի անվանական ՀՆԱ-ն կազմում է 47,6 միլիարդ դոլար, Հայաստանինը՝ 13 մլրդ, այսինքն տարբերությունը 3,7 անգամ է:

«Մեր արժութային պահուստները կազմում են 51 մլրդ դոլար, Հայաստանինը՝ 2 մլրդ դոլար: Այլ կերպ ասած՝ մեր պահուստները 25 անգամ ավելի շատ են: Ադրբեջանի արտաքին առևտրաշրջանառությունը կազմում է 33,6 մլրդ դոլար, Հայաստանինը՝ 7,4 մլրդ դոլար (4,5 անգամ ավելի քիչ): Մեր արտաքին առևտրի պրոֆիցիտը կազմում է 6 մլրդ դոլար, իսկ Հայաստանում այդ ցուցանիշը բացասական է և կազմում է 2,6 մլրդ դոլար: 2019-ին Ադրբեջանի տնտեսության մեջ ներդրվել է 13,5 մլրդ դոլար, Հայաստանում՝ 0,9 մլրդ դոլար», - ասել է նա:

Իլհամ Ալիևն ընդգծել է, որ Ադրբեջանի արտաքին պարտքը կազմում է ՀՆԱ-ի 17%-ը, իսկ Հայաստանում՝ այդ ցուցանիշը կազմում է ավելի քան 40%, Ադրբեջանի արժութային պահուստները 6,4 անգամ գերազանցում են արտաքին պարտքը, իսկ Հայաստանում՝ 2,3 անգամ:

Նախագահը նշել է, որ 2019-ի դեկտեմբերին միջին ամսական աշխատավարձն Ադրբեջանում կազմել է 425 դոլար, Հայաստանում՝ 369 դոլար, նվազագույն կենսաթոշակի չափն Ադրբեջանում կազմել է 118 դոլար, Հայաստանում՝ 55 դոլար, միջին կենսաթոշակի չափն Ադրբեջանում 154 դոլար է, Հայաստանում՝ 84 դոլար, գործազրկությունն Ադրբեջանում կազմում է 4,8%, Հայաստանում՝ 24%:

Իլհամ Ալիևն ընդգծել է, որ Ադրբեջանը Հայաստանին գերազանցում է նաև ռազմական ոլորտում: Ուժեղագույն բանակների վարկանիշային ցանկում Ադրբեջանը զբաղեցնում է 52-րդ տեղը, իսկ Հայաստանը գտնվում է 96-րդ հորիզոնականում: «Ռազմաօդային ուժերի ցուցանիշով մենք 63-րդ հորիզոնականում ենք, իսկ Հայաստանը՝ 67-րդ, Ռազմածովային ուժերի ցուցանիշով մենք 67-րդ տեղում ենք, իսկ Հայաստանն ընդհանրապես ծով չունի», - հայտարարել է Ադրբեջանի նախագահը:

Երկրի ղեկավարն ընդգծել է, որ ներկայումս Հայաստանը գտնվում է քաղաքական, տնտեսական, տրանսպորտային և ներդրումային փակուղում: Քանի դեռ օկուպացված ադրբեջանական հողերը չեն ազատվել, այդ իրավիճակը շարունակվելու է:

«Բոլոր այս թվերն իրական են, այլ ոչ թե ֆանտաստիկայի ժանրից, ինչպիսին են Հայաստանի ղեկավարության ներկայացրած թվերը: Եթե խոսենք սպորտային տերմինոլոգիայով, ապա Ադրբեջանը գտնվում է բարձրագույն լիգայում, իսկ Հայաստանը՝ երրորդ», - հավելել է Իլհամ Ալիևը:

ARMENIA.AZ