Ադրբեջանի նախագահը Բաքվի քաղաքապետին հանձնարարել է՝ վերացնել բնակչության հետ կապված քաղաքային ծառայությունների աշխատանքում բոլոր թերությունները

05 Նոյեմբերի 2019 - 09:37

Ադրբեջանի նախագահ Իլհամ Ալիևը՝ Բաքվի Գործադիր իշխանության ղեկավար Էլդար Ազիզովին հանձնարարել է՝ խստորեն պահպանել մայրաքաղաքում քաղաքաշինության նորմերը:

«Մենք պետք է լուծենք բոլոր խնդիրները, որոնք հուզում են Բաքվի բնակիչներին, ներառյալ շինարարության հարցում: Ես հանձնարարականներ եմ տվել այդ հարցի վերաբերյալ: Որոշ դեպքերում զավթվում են շինհրապարակները, որոշ դեպքերում թույլտվությունները ապօրինի են տրվում, ծառերը հատվում են», - երկուշաբթի Ազիզովի հետ հանդիպմանը ասել է Ալիևը, հայտնում է Аrmenia.Az-ը:

Նրա խոսքով, որոշ դեպքերում բնակչությունը միջամտում է և հայտնում նման ապօրինի գործողությունների մասին:

«Սրանից հետո Բաքվում պետք է ամբողջությամբ պահպանվեն քաղաքաշինության կանոնները: Դժբախտաբար, այդ կանոնները խախտվել են: Գոյություն ունեցող տների հարևանությամբ կառուցվել են նոր երկնաքերեր, նրանք փակել են բնակիչների համար արևի մուտքը՝ առանձին «ձեռնարկատերերի» շնորհիվ,- ասել է Ի.Ալիևը:

Նախագահը նշել է, որ որոշ դեպքերում դպրոցների բակերում կառուցվել են նոր շինություններ: «Բայց մենք վերջ տվեցինք դրան: Դրա համար էլ պետք է կիրառվեն քաղաքաշինության կանոնները: Քաղաքաշինության և ճարտարապետության պետական կոմիտեն պետք է իր աշխատանքները կազմակերպի բարձր մակարդակով, շրջանային գործադիր իշխանությունները պետք է ուշադրություն դարձնեն քաղաքացիներին: Որոշ դեպքերում տանջում են քաղաքացիներին, նրանց խնդիրներին որևէ արձագանք չկա, որոշ դեպքերում նրանցից պահանջվում է ապօրինի վճարումներ, կան կոռուպցիայի փաստեր: Նման ազդանշանները հասնում են մեզ, և շրջանային գործադիր իշխանությունները պետք է անհրաժեշտ եզրակացություններ անեն», - հանձնարարել է պետության ղեկավարը:

Նա հավելել է, որ առավելագույն ուշադրություն պետք է դարձվի բնակչությանը, բոլոր դիմումները պետք է օբյեկտիվորեն քննարկվեն:

ARMENIA.AZ