Իլհամ Ալիև. Նվազագույն աշխատավարձի և կենսաթոշակի աճը պետք է լինի մշտական գործընթաց

23 Ապրիլի 2019 - 17:10

Հարկային և մաքսային մարմինները՝ 2019 թ. առաջին եռամսյակում պետական բյուջեի մուտքերի կանխատեսումները գերակատարել են ավելի քան 200 մլն մանաթով, հայտարարել է Ադրբեջանի նախագահ Իլհամ Ալիևը:

«Այս տարվա առաջին երեք ամիսներին բյուջետային մուտքերը զգալիորեն աճել են: Այսինքն, հարկային և մաքսային մարմինները պետական բյուջե են փոխանցել ավելի քան 200 մլն մանաթ: Սա ձեռք է բերվել բարեփոխումների, թափանցիկության և անցկացվող քաղաքականության շնորհիվ», - Բաքվի Խազարի շրջանում Մարդաքյան--Գալա ավտոմոբիլային ճանապարհի բացման արարողությանը՝ բնակչության հետ հանդիպման ժամանակ ասել է երկրի ղեկավարը, հայտնում է Armenia.az-ը` հղում անելով «Ինտերֆաքս-Ազերբայջան»-ին:

Նախագահ Ի.Ալիևի խոսքով, ստացված լրացուցիչ միջոցները, առաջին հերթին ուղղվում են սոցիալական հարցերի լուծմանը:

«Պատահական չէ, որ անցած տարվա ապրիլին՝ նախագահական ընտրություններից հետո իմ առաջին կարգադրությունը ուղղված էր շեհիդների ընտանիքների բարեկեցության բարելավմանը: Իմ հաջորդ կարգադրությունները նույնպես ուղղված են բնակչության կյանքի բարելավմանը: Նվազագույն աշխատավարձը և կենսաթոշակները աճել են գրեթե 40% -ով: Չնայած նրան, որ տոկոսային արտահայտությամբ դա բարձր ցուցանիշ է, այն չի կարող մեզ բավարարել, մենք պետք է հասնենք ավելի մեծ արդյունքների», - ընդգծել է պետության ղեկավարը:

Իլհամ Ալիևը նշել է, որ սոցիալական նպաստները միջին հաշվով ավելացել են 2 անգամ, հարկադիր վերաբնակների և շեհիդների ընտանիքների նպաստները, ուսանողների կրթաթոշակները՝ 50 տոկոսով:

«Շատ կարևոր որոշումներ ու կարգադրություններ են ստորագրվել, որոնք ուղղված են բնակչության բարեկեցության և գործարար միջավայրի բարելավմանը, և մենք կշարունակենք աշխատել այդ ուղղությամբ: Նվազագույն աշխատավարձի և կենսաթոշակի աճը պետք է լինի մշտական գործընթաց », - ասել է Ի.Ալիևը:

ARMENIA.AZ