Թուրքիայում ընդունելություն է կազմակերպել Ադրբեջանի Զինված ուժերի օրվա կապակցությամբ

19 Հունիսի 2025 - 10:30

Անկարայի «Գազի» բանակի տանը (Gazi Ordu Evi) տեղի է ունեցել ընդունելություն՝ Ադրբեջանի Զինված ուժերի օրվա կապակցությամբ։

AZERTAC-ի փոխանցմամբ՝ Թուրքիայում Ադրբեջանի դեսպան Ռաշադ Մամեդովի և ռազմական կցորդ, Հայրենական պատերազմի հերոս, գեներալ-մայոր Զաուր Զեյնալովի անունից կազմակերպված միջոցառմանը մասնակցել են Թուրքիայի ազգային պաշտպանության նախարար Յաշար Գյուլերը, օտարերկրյա դիվանագիտական առաքելությունների ռազմական կցորդներ, երկու եղբայրական երկրների հասարակության ներկայացուցիչներ և այլն։

Միջոցառման մասնակիցներին դիմելով՝ Զաուր Զեյնալովն ընդգծել է Թուրքիայի և Ադրբեջանի միջև բարեկամության և եղբայրության անխախտելիությունը, հիշեցրել է 44-օրյա Հայրենական պատերազմի և մեկօրյա հակաահաբեկչական գործողության մասնակիցների սխրագործությունները, որոնց արդյունքում վերականգնվեց Ադրբեջանի տարածքային ամբողջականությունն ու ինքնիշխանությունը։

Իր հերթին, Թուրքիայի ազգային պաշտպանության նախարարը նշել է երկու եղբայրական երկրների միջև միասնության և համերաշխության կարևորությունը ժամանակակից մարտահրավերների ֆոնին։ «Թուրքիան և Ադրբեջանը կարևոր ռազմավարական դիրք ունեն։ Մեր երկրների պաշտպանական հզորության և համագործակցության ամրապնդումը ընտրության հարց չէ, այլ անհետաձգելի անհրաժեշտություն», - ընդգծել է Գյուլերը։

Թուրք նախարարի խոսքով՝ Անկարան և Բաքուն երկու ռազմավարական գործընկերներ են, որոնք կապված են եղբայրության անխզելի կապերով։ «Մեր երկրները պետք է միասնական մնան և աջակցեն միմյանց ցանկացած պայմաններում։ 44-օրյա պատերազմում տարած հաղթանակը ոչ միայն փառավոր էջ է Ադրբեջանի պատմության մեջ, այլև հպարտության աղբյուր ամբողջ թյուրքական աշխարհի համար։ Ադրբեջանի հաղթանակը մեծ նշանակություն ունի կովկասյան տարածաշրջանում խաղաղության և կայունության համար», - ասել է Գյուլերը՝ հույս հայտնելով, որ շուտով Հարավային Կովկասում կայուն խաղաղություն կհաստատվի։

ARMENIA.AZ