Ադրբեջանցի փորձագետ. Փաշինյանը չի վերահսկում իրավիճակը Հայաստանում

20 Մայիսի 2019 - 17:38

Վարչապետ Նիկոլ Փաշինյանը իր համար բարդ պայմաններում՝ «հեղափոխության շարունակման» մասին իր հայտարարություններով խորացնում է Հայաստանում անկայունությունը։

Այդ մասին Armenia.Az-ին հայտարարել է քաղաքագետ Թոֆիգ Աբասովը։

«Փաշինյանական իշխանությունը թույլ է և չի վերահսկում իրավիճակը երկրում։ Տեսնելով իր համար բարդ իրավիճակը՝ Փաշինյանը ժողովրդին և իր կողմնակիցներին կոչ է անում արգելափակել դատարարնների շենքերը նրա համար, որ նա չունի իրավական լծակներ, որպեսզի իրավիճակը վերցնի իր վերահսկողության տակ և գործի օրենքի ուժով։ Սա շատ ցուցադրական պահ է, երբ Փաշինյանի համար դժվար է դառնում, հենց որ նա ընկնում է անհարմար վիճակի մեջ, նա հայտարարում է, որ հեղափոխությունը շարունակվում է»,- հայտարարել է Թ. Աբասովը։

Նրա խոսքով, ինքստինքյան «հեղափոխության» գաղափարները և առաջնահերթությունները այնքան աննկատ են և անորոշ, որ Հայաստանում անկայունությունը վերածվում է հաստատուն, մշտապես գործող իրավիճակի։

Փորձագետը համարում է, որ իրավիճակի նորմալացման համար Հայաստանի ազգային էլիտան առաջին հերթին պետք է կողմնորոշվի իր խնդիրների հարցում, ով հիանալի հասկանում է, որ «հայկական հանրապետության բոլոր խնդիրների աղբյուրը՝ Ղարաբաղի օկուպացիան է», սակայն չի համարձակվում կատարել ինքնակամ շարժումներ և գնալ փոխզիջումների ադրբեջանական կողմի հետ։

«Տվյալ դեպքում ինձ թվում է, որ այստեղ հարկավոր է հաշվի առնել ղարաբաղյան կլանի, անջատողականների դերը և պայթուցիկ հզորությունը, ովքեր շարունակում են կողմնորոշիչ ազդեցություն ցուցաբերել վերնախավի մտատրամադրվածության վրա։ Անջատողականության այս հարթակը, որը բույն է դրել ադրբեջանական հողերում, միշտ կխաղա պայթունավտանգ նյութի դեր, որովհետև հարկավոր է միանգամից լուծել այդ խնդիրը»,- ընդգծել է Թ. Աբասովը։

Քաղաքագետի կարծիքով, Հայաստանում կազմավորվել է այնպիսի ծայրահեղ իրավիճակ, երբ ազգային էլիտայի առողջ և չափավոր ուժերը պետք է «փշրեն» անջատողականների ատամները, ովքեր մշտապես ճոճում են նիզակները, և կողմնորոշվեն ապագա հայկական պետականության հարցում։

«Քանի դեռ Քոչարյանը ազատության մեջ է, ապա նա այժմ կխաղա հանդարտության գրգռիչ դերը։ Հավանական է իշխանության վերազավթման համար նա հույս կդնի իր հին հնարավորությունների և հին կողմնակիցների վրա։ Փաշինյանը և նրա կողմնակիցները ի վիճակի են վերահսկողության տակ վերցնել իրավիճակը և կանխել նոր պետական հեղաշրջումը, կամ կլինեն 1995 թվականին խորհրդարանում տեղի ունեցած հարձակման նման ահաբեկչական ակտեր։ Եթե այդ հավակնություններին չհակադրել հստակ արգելապատնեշ, ապա ազգային էլիտայի հետ անջատողականների, ղարաբաղյան մաֆիոզային կլանի այդ պատերազմը, այդ ամենը կարող է բերել ողբալի հետևանքների՝ առանց այդ էլ անկանխագուշելի երկրում»,- եզրափակել է նա։

ARMENIA.AZ